Ўзбекистон Республикасининг Олмаота шаҳридаги Бош консулхонаси Ўзбекистон туристик салоҳиятини тарғиб қилиш ва Қозоғистон туристларини жалб қилиш бўйича доимий равишда ишлар олиб бормоқда.
Жорий йилнинг 9 август куни Ўзбекистон Республикаси Бош консуллиги “Дўстлик уйи”да (Дом Дружбы) ва Қизилўрда вилояти жисмоний тарбия, спорт ва туризм бошқармаси бошлиғи ўринбосари Жулдизхон Ерқосаев бошчилигидаги туризм соҳаси вакилларидан иборат туризм бизнес вакиллари билан танишиш ва “Ўзбекистон туристик жозибадорлиги” тарғиб қилиш мақсадида тадбир ўтказилди.
Қозоғистон томонидан учрашувда сўзга чиққан Жулдизхон Байназарович тадбир иштирокчиларига Қизилўрда туризм солоҳияти ва Бойқўнғир мажмуаси, Кичик Орол денгизи салоҳияти, “Қорқит ота” ёдгорлик мажмуаси, “Сйганак” шаҳри ва “Саусқандиқ” петроглифлари, Жанакорган санаторий мажмуаси, Барсакелмес қўриқхонаси ва Камбаш кўли каби сайёҳлик масканлари ҳақида ҳам тўхталиб ўтди.
Бош консулхона ходимлари Э.Абдуқаюмов ва Д.Собиров томонидан Ўзбекистон ўзининг бой номоддий маданий мероси, жумладан, мусиқа, ҳунармандчилик, ошхона ва кўп асрлик фестиваллари билан машҳурлиги, шунингдек мамлакатда туризм инфратузилмасини ривожлантириш бўйича фаол ишлар олиб борилаётгани, бунда мамлакат туризмининг аҳамиятини ошириш мақсадида янги меҳмонхоналар қурилаётгани, транспорт тармоқларини ривожлантирилаётгани ва туризм хизматларини яхшилашга алоҳида эътибор қаратилаётгани ҳақида намойиш этиш учун тайёрланган презентация ва махсус тайёрланган видеофилмларни тақдим этдилар.
Ўзбекистондан 15 та йирик туроператор мамлакатнинг сайёҳлик салоҳиятини таъкидлаб, ўзларининг мақбул нарҳдаги ва сифатли тур пакетлари билан бўлишди.
Шундан сўнг, тадбирда “Байконур” космодромидаги Байтерек Қозоғистон-Россия қўшма корхонаси филиали директори ўринбосари Курганбек Тансйкбаевич ва “Халқаро оролларни бошқариш жамғармаси”нинг Қозоғистон Республикасидаги Ижроия дирекцияси жамоат фондининг Қизилўрда филиали раҳбари Еркинин Амандйкович сўзга чиқиб, ўзларининг туризм бўйича таклифларини билдирдилар.
Тадбир якунида Ўзбекистон ва Қозоғистон, Қизилўрда шаҳридаги йирик туроператорлар ўртасида ўзаро самарали ҳамкорликни йўлга қўйишга келишиб олинди.
