Oʻzbekiston internet tezligi boʻyicha 4 pogʻonaga yuqoriladi

Ookla kompaniyasining Speedtest.net servisi 2020-yil yanvar oyi natijalariga koʻra yangi maʼlumotlarni eʼlon qildi.

Unga koʻra, Speedtest Global Index mobil va simli aloqa internet tezligi reytingi boʻyicha Oʻzbekiston toʻrt pozitsiyaga yuqoriladi.

Umumiy reytingida esa Oʻzbekiston hozirgi kunda 104-pogʻonani egallab, 2019-yil yanvar holatiga nisbatan 15 pozitsiyaga koʻtarildi. Bu mazkur davr boʻyicha butun dunyoda eng yuqori oʻsish boʻldi.

2020-yil yanvar oyi holatiga koʻra biz bir qator davlatlardan oldindamiz ­– Gruziya (107-oʻrin), Ozarbayjon (116-oʻrin), Tojikiston (109-oʻrin) hamda Turkmaniston (176-oʻrin).

Umuman oxirgi yil natijalariga koʻra Oʻzbekistonda aniqlangan internet tezligi 10,89 Mbit/s dan 25,75 Mbit/c gacha oʻsdi.

Maʼlumot uchun, Speedtest portali internet tezligini tekshirish uchun umumjahon internet foydalanuvchilar tomonidan ishlatiladi. Portal foydalanuvchilar tomonidan berilgan maʼlumotlar asosida tahlil olib boradi va doimiy ravishda reyting tayyorlaydi.

Speedtest portalida har yili foydalanuvchilar tomonidan 10 milliarddan oshiq testlar oʻtkaziladi.

OʻzA